========
ഉപകരണം
========
കംപ്യൂട്ടറിന്റെ USB പോർട്ടിലാണ്  ExpEYES ഘടിപ്പിക്കുന്നത് . പ്രവർത്തിക്കാനാവശ്യമായ വൈദ്യുതിയും ഇതേ പോർട്ടിൽ നിന്നും എടുക്കുന്നു. പൈത്തൺ ഭാഷയിലാണ് ഇതിന്റെ പ്രോഗ്രാമുകൾ എഴുതപ്പെട്ടിരിക്കുന്നത് . ഓസ്‌സിലോസ്കോപ്പ് , ഫംക്ഷൻ  ജനറേറ്റർ , വോൾട് മീറ്റർ , DC പവർസപ്പ്ലൈ, എന്നീ  ഉപകരണങ്ങൾക്ക്  പകരമായും  ഇതിനെ  ഉപയോഗിക്കാവുന്നതാണ്. പുറമെ നിന്നുള്ള  സിഗ്നലുകൾ ഘടിപ്പിക്കാൻ കുറെ ടെർമിനലുകൾ ലഭ്യമാണ് . ExpEYES ന്റെ വിവിധ ടെർമിനലുകളുടെ സ്വഭാവം മനസ്സിലാക്കുക  എന്നതാണ്  ഇതിന്റെ ഉപയോഗത്തിന്റെ  ആദ്യപടി. ടെർമിനലുകൾ  പൊതുവായി രണ്ട് തരത്തിൽ പെടുന്നു. വോൾടേജ്, കറന്റ്  എന്നിവ പുറത്തേക്കു തരുന്ന ഔട്ട്പുട്ട് ടെർമിനലുകൾ, അളക്കാൻ വേണ്ടി പുറത്തുനിന്നും  സിഗ്നലുകൾ സ്വീകരിക്കുന്ന ഇൻപുട്ട്  ടെർമിനലുകൾ എന്നിവയാണവ. ഇവയെ ഓരോന്നായി താഴെ വിവരിച്ചിരിക്കുന്നു. 

ശ്രദ്ധിക്കേണ്ട ഒരുകാര്യം മറ്റുപകരണങ്ങളിൽ നിന്നും ExpEYES നോടു  കണക്ട് ചെയ്യുന്ന സിഗ്നലുകളുടെ വോൾട്ടേജുകൾ നിശ്ചിത പരിധിക്കുള്ളിലായിരിക്കണം എന്നതാണ്. A1, A2 എന്നീ ഇൻപുട്ടുകൾ  +/- 16 വോൾട്  പരിധിക്കുള്ളിലും  IN1, IN2 എന്നിവ   0 - 3.3 പരിധിക്കുള്ളിലും  ആയിരിക്കണം. അല്ലെങ്കിൽ ഉപകരണം കേടാവാൻ സാധ്യതയുണ്ട് . 

**ഔട്ട്പുട്ട് ടെർമിനലുകൾ** 

.. figure:: pics/scope-outputs.png
   :width: 300px

- CCS : കോൺസ്റ്റന്റ്  കറന്റ്  സോഴ്സ് 
        ഈ ടെർമിനലിൽ നിന്നും ഒരു റെസിസ്റ്റർ ഗ്രൗണ്ടിലേക്ക് ഘടിപ്പിച്ചാൽ അതിലൂടെ ഒഴുകുന്ന കറന്റ് എപ്പോഴും 1.1 മില്ലി ആംപിയർ ആയിരിക്കും. ഘടിപ്പിക്കുന്ന റെസിസ്റ്റൻസ് പൂജ്യമായാലും 1000 ഓം ആയാലും കറന്റിന് മാറ്റമുണ്ടാവില്ല. ഘടിപ്പിക്കാവുന്ന പരമാവധി റെസിസ്റ്റൻസ് 2000 ഓം ആണ് .

- PV1 : പ്രോഗ്രാമ്മബിൾ വോൾടേജ്  സോഴ്സ് 
       ഇതിന്റെ വോൾടേജ്  -5വോൾട്ടിനും +5വോൾട്ടിനും ഇടയിൽ എവിടെ വേണമെങ്കിലും സെറ്റ് ചെയ്യാവുന്നതാണ് . സോഫ്റ്റ്‌വെയറിലൂടെയാണ് വോൾടേജ് സെറ്റ് ചെയ്യുന്നത്. ഇങ്ങിനെ സെറ്റ് ചെയ്യുന്ന വോൾടേജ്  PV1നും ഗ്രൗണ്ടിനും ഇടക്ക് ഒരു മൾട്ടിമീറ്റർ ഘടിപ്പിച്ചു അളന്നു നോക്കാവുന്നതാണ് . ഇതുപോലുള്ള മറ്റൊരു വോൾടേജ് സോഴ്സണ് PV2 പക്ഷെ അതിന്റെ വോൾടേജ്  -3.3 വോൾട് മുതൽ +3.3 വോൾട് വരെ മാത്രമേ സെറ്റ് ചെയ്യാനാവൂ. 

- SQ1 സ്‌ക്വയർവേവ് ജനറേറ്റർ 
      ഇതിന്റെ വോൾടേജ് പൂജ്യത്തിനും അഞ്ചു വോൾട്ടിനും ഇടയിൽ ക്രമമായി മാറിക്കൊണ്ടിരിക്കും. ഒരു സെക്കൻഡിൽ എത്ര തവണ മാറുന്നു എന്നത് (അഥവാ ഫ്രീക്വൻസി ) സോഫ്ട്‍വെയറിലൂടെ സെറ്റ് ചെയ്യാവുന്നതാണ് . SQ2 ഇതുപോലുള്ള മറ്റൊരു ഔട്ട്പുട്ടാണ് . 

- OD1 : ഡിജിറ്റൽ ഔട്ട്പുട്ട് 
       ഈ ടെർമിനലിലെ വോൾട്ടേജ് ഒന്നുകിൽ പൂജ്യം അല്ലെങ്കിൽ അഞ്ചു വോൾട് ആയിരിക്കും. ഇതും സോഫ്ട്‍വെയറിലൂടെയാണ്  സെറ്റ് ചെയ്യുന്നത്.

- WG : വേവ്‌ഫോം ജനറേറ്റർ 
        സൈൻ , ട്രയാൻഗുലർ എന്നീ ആകൃതികളിലുള്ള സിഗ്നലുകൾ ഇതിൽ സെറ്റ് ചെയ്യാം.  ഫ്രീക്വൻസി  5 ഹെർട്സ് മുതൽ 5000 ഹെർട്സ് വരെയാവാം. ആംപ്ലിട്യൂഡ് 3 വോൾട് , 1 വോൾട് , 80 മില്ലിവോൾട് എന്നിങ്ങനെ മൂന്നു മൂല്യങ്ങളിൽ  സെറ്റ് ചെയ്യാം. വേവ്ഫോമിന്റെ ആകൃതി SQR ആയി സെറ്റ് ചെയ്താൽ SQ2 വിൽ നിന്നാവും ഔട്ട്പുട്ട് കിട്ടുക. WGയും SQ2ഉം ഒരേസമയം ഉപയോഗിക്കാൻ പറ്റുന്നതല്ല. WG യുടെ നേരെ വിപരീതമായ തരംഗമാണ്  WGബാറിൽ ലഭിക്കുക. WGയും SQ2ഉം  ഒരേസമയം ഉപയോഗിക്കാൻ പറ്റില്ല.

 **ഇൻപുട്ട്  ടെർമിനലുകൾ**

.. figure:: pics/scope-inputs.png
   :width: 300px


- IN1 : കപ്പാസിറ്റൻസ്  അളക്കുന്ന ടെർമിനൽ 
    അളക്കേണ്ട കപ്പാസിറ്ററിനെ  IN1 നും ഗ്രൗണ്ടിനും ഇടയ്ക്ക്  ഘടിപ്പിക്കുക. സ്‌ക്രീനിന്റെ വലതുഭാഗത്തു മുകളിലായി കാണുന്ന "കപ്പാസിറ്റൻസ് IN1" എന്ന ബട്ടൺ അമർത്തുക. വളരെ ചെറിയ കപ്പാസിറ്ററുകൾ വരെ ഇതിൽ അളക്കാം. ഒരു കഷണം കടലാസ്സിന്റെയോ പ്ലാസ്റ്റിക് ഷീറ്റിന്റെയോ രണ്ടു വശത്തും അലൂമിനിയം ഫോയിൽ ഒട്ടിച്ചു കപ്പാസിറ്റർ നിർമിക്കാവുന്നതാണ്.

- IN2 : ഫ്രീക്വൻസി  കൗണ്ടർ 
      ഏതെങ്കിലും സർക്യൂട്ടിൽ നിന്നുള്ള സ്‌കൊയർ വേവ്  സിഗ്നൽ ഇതിൽ ഘടിപ്പിച്ചു ആവൃത്തി അളക്കാൻ പറ്റും. SQ1  ഔട്ട്പുട്ട് ഉപയോഗിച്ചു്  ഇതിനെ പരീക്ഷിച്ചു നോക്കാവുന്നതാണ്. ആവൃത്തിക്കു പുറമെ ഡ്യൂട്ടിസൈക്കിളും (എത്ര ശതമാനം സമയം സിഗ്നൽ ഉയർന്ന നിലയിലാണ് എന്നത് )അളക്കാൻ പറ്റും.  

- SEN : സെൻസർ എലെമെന്റ്സ് 
      ഫോട്ടോട്രാൻസിസ്റ്റർ പോലെയുള്ള സെൻസറുകൾ ഇതിലാണ് ഘടിപ്പിക്കുന്നത്. SEN ഇൻപുട്ടിൽ നിന്നും ഗ്രൗണ്ടിലേക്കുള്ള റെസിസ്റ്റൻസ് ആണ് അളക്കുന്നത്. ഒരു 1000 ഓം റെസിസ്റ്റർ ഘടിപ്പിച്ചു ഇതിനെ ടെസ്റ്റ് ചെയ്യാവുന്നതാണ് .

- A1ഉം   A2ഉം   A3യും  : വോൾട്ടിമീറ്ററും  ഓസ്‌സിലോസ്കോപ്പും 
      ഇതിൽ ഘടിപ്പിക്കുന്ന DC വോൾടേജുകൾ അളക്കാൻ സ്‌ക്രീനിന്റെ വലതുഭാഗത്തായുള്ള A1, A2, A3  എന്നീ ചെക്ക്‌ബോക്‌സുകൾ ടിക്ക്  ചെയ്യുക. ഘടിപ്പിക്കന്ന വോൾടേജ് സിഗ്നലിന്റെ ഗ്രാഫ്  സ്‌ക്രീനിന്റെ ഇടതുഭാഗത്ത്  കാണാം. വലതുവശത്ത്  കാണുന്ന A1, A2, A3, MIC എന്നീ  നാലു ചെക്ക്‌ബോക്‌സുകൾ ഉപയോഗിച്ച്  നമുക്കുവേണ്ട ഗ്രാഫ്  തെരഞ്ഞെടുക്കാം. A1  തുടക്കത്തിൽ തന്നെ  ചെക്ക് ചെയ്തുകാണാം.  A1, A2 എന്നീ ഇൻപുട്ടുകൾ -16 മുതൽ +16 വരെയുള്ള വോൾടേജുകൾ സ്വീകരിക്കും എന്നാൽ A3 യുടെ പരിധി +/-3.3  ആണ് . ഇൻപുട്ട് വോൾട്ടേജിനനുസരിച്ചുള്ള റേഞ്ച് സെലക്ട് ചെയ്യാവുന്നതാണ് . അളക്കുന്ന സിഗ്നലിന്റെ ആവൃത്തിക്കനുസരിച്ചുള്ള ടൈംബേസ്  സെലക്ട് ചെയ്യണം .

- MIC : മൈക്രോഫോൺ 
      ഓഡിയോ ഉപകരണങ്ങളിൽ സർവസാധാരണമായ കണ്ടൻസർ മൈക്രോഫോൺ ഈ ടെർമിനലിൽഘടിപ്പിക്കും  ഘടിപ്പിക്കാം. ശബ്ദത്തെപ്പറ്റി പഠിക്കാൻ വേണ്ടിയുള്ള പരീക്ഷണങ്ങളിൽ ഈ ടെർമിനൽ ഉപയോഗപ്പെടുന്നു.

- Rg : A3 യുടെ ഗെയിൻ റെസിസ്റ്റർ 
    വളരെ ചെറിയ വോൾട്ടേജുകൾ A3 യിൽ ഘടിപ്പിക്കുമ്പോൾ ഇതുപയോഗിച്ചു ആംപ്ലിഫൈ ചെയ്യാം. 1 + 10000 /Rg  ആണ്  ആംപ്ലിഫിക്കേഷൻ. ഉദാഹരണമായി 1000 ഓം റെസിസ്റ്റർ ഘടിപ്പിച്ചാൽ 1 + 10000/ 1000  = 11  ആയിരിക്കും ഗെയിൻ .
 
- I2C ഇന്റർഫേസ് 
   താപനില, മർദ്ദം, വേഗത, ത്വരണം എന്നിവ അളക്കാനുള്ള വളരെയധികം സെൻസറുകൾ മാർക്കറ്റിൽ ലഭ്യമാണ് . I2C സ്റ്റാൻഡേർഡ് അനുസരിച്ചുള്ള ഈ സെൻസറുകൾ എക്സ്പൈസിൽ  ഉപയോഗിക്കാവുന്നതാണ്. Ground, +5 വോൾട്, SCL, SDA എന്നീ സോക്കറ്റുകളിലാണ് ഇവയെ ഘടിപ്പിക്കുന്നത് .

- +/-6V / 10mA DC സപ്ലൈ
   ഓപ്പറേഷനൽ ആംപ്ലിഫൈയർ സർക്യൂട്ടുകൾ പ്രവർത്തിപ്പിക്കാൻ ആവശ്യമായ വോൾടേജ്കൾ  V+, V- എന്നീ സോക്കറ്റുകളിൽ ലഭ്യമാണ് .

ചില പ്രാഥമിക പരീക്ഷണങ്ങൾ 
-------------------------

- ഒരു കഷ്ണം വയർ PV1 ൽ നിന്നും A1 ലേക്ക്  കണക്ട്  ചെയ്യുക. സ്‌ക്രീനിൽ  മുകൾഭാഗത്തുള്ള   A1 ചെക്ക്ബോക്സ്  ടിക്ക് ചെയ്യുക .  PV1 സ്ലൈഡർ നിരക്കുമ്പോൾ A1 കാണിക്കുന്ന വോൾടേജ് മാറിക്കൊണ്ടിരിക്കും.

- WG യെ A1 ലേക്ക്  കണക്ട്  ചെയ്യുക. സ്‌ക്രീനിന്റെ വലതുവശത്തു  നടുക്കായുള്ള  A1 ചെക്ക്ബോക്സ്  ടിക്ക് ചെയ്യുക. അതിന്റെ മുൻപിലുള്ള 4V റേഞ്ചിനെ മാറ്റുമ്പോൾ എന്ത് സംഭവിക്കുന്നു എന്ന് നോക്കുക. ടൈംബെയ്‌സ് മാറ്റി നോക്കുക . സൈൻ വേവിനെ ത്രികോണമോ ചതുരമോ ആക്കി മാറ്റി നോക്കുക .

- ഒരു പീസ്സോ ബസ്സർ WG യിൽ നിന്നും ഗ്രൗണ്ടിലേക്ക് ഘടിപ്പിക്കുക. WG യുടെ ആവൃത്തി മാറ്റി 3500നടുത്തു കൊണ്ടുവരുക.




